Fyrir þessi jól var sú nýbreytni tekin upp að allir bekkir skreyttu sínar hurðir. Útkoman var glæsileg eins og sjá má á þessum myndum og setti sterkan jólasvip á þessa síðustu daga fyrir jól.

Á morgun verða litlu jólin hjá okkur hér í skólanum. Nemendur mæta prúðbúnir kl. 9:00 í sínar umsjónarstofur, sem allar eru nú orðnar vel skreyttar og tilbúnar fyrir hátíð morgundagsins. Hefð er fyrir því að nemendur skiptist á jólapökkum, borði smákökur, dansi í kringum jólatréð og eigi notalega stund með samnemendum og starfsfólki. Skóla lýkur svo um kl. 12:00 og þar með hefst jólaleyfið. Strætó fer úr Holtahverfi og Hnífsdal kl. 8:40 og heim aftur kl. 12:05.

Í skólanum okkar eru nemendur sem tala ýmis tungumál. Við fengum nokkra þeirra til að skrifa gleðileg jól  á tungumálunum og hér á meðfylgjandi mynd má sjá afraksturinn á íslensku, filipseysku, sænsku, dönsku, norsku, ensku, spænsku, portúgölsku, taílensku, pólsku og þýsku.

Gleðileg jól.

Á morgun er skreytingadagur hér í skólanum. Tímaplön haldast óbreytt hjá yngsta- og miðstigi, en unglingastigið fer heim um hádegisbilið.

Við hvetjum alla til að mæta í einhverju rauðu, og/eða jólapeysum á morgun til að gera stemninguna enn betri, en þessi dagur einkennist af skreytingum eins og nafnið gefur til kynna. Lítið verður um bóklegar greinar, en þeim mun meiri áhersla á aðventustemningu, þar sem hver bekkur skreytir sína kennslustofu, leggur lokahönd á allt jólaföndur, hlustar á jólatónlist og nýtur dagsins sem best.

Í dag voru vinaliðar í 4. - 7. bekk kallaðir á sal til að þakka þeim vel unnin störf. Hlutverk vinaliða er fyrst og fremst að skapa skemmtilegt og notalegt leikjaumhverfi í frímínútum, stjórna leikjum og vera til fyrirmyndar í hvívetna. Vinaliðar fá leiðtogaþjálfun og námskeið undir stjórn Árna Heiðars Ívarssonar og fá því töluvert út úr sínu hlutverki.

Vinaliðum var boðið í sund til Bolungarvíkur í morgun, í ,,musteri vatns og vellíðunar" eins og sundlaugin er stundum kölluð. Þar átti hópurinn skemmtilega stund og kom svo til baka í skólann um hádegisbilið.

Eftir áramót verða nýir vinaliðar kjörnir af nemendum, en við það val eru nemendur skólans sérstaklega beðnir um að tilnefna einstaklinga sem þeim finnst vera vingjarnlegir og sýni öðrum nemendum virðingu.

Björn Baldursson og Jóna Símonía Bjarnadóttir lesa fyrir nemendur og fræða þá um gamlar jólahefðir.

Árleg jólasýning Safnahússins stendur nú yfir, þar sem fjallað er um jólavætti. Umgjörð sýningarinnar var hönnuð af listamanninum Ómari Smára Kristinssyni. 

Þegar skammdegið er svartast eru ýmsar vættir á ferð sem ekki vilja sjást. Tröll, huldufólk, jólasveinar og jólakötturinn eru meðal þeirra en áður og fyrr þótti bæði tröllum og jólakettinum gott að fá mannakjöt í jólamatinn. Skammdegisvættirnar eru ævafornar, Grýla er t.d. nefnd í Snorra-Eddu þó ekki sé hún kennd við jól fyrr en á 17. öld. Jólasveinarnir hafa sýnt ótrúlega aðlögunarhæfni en þeir hafa á sinni löngu ævi breyst úr illum vættum í ljúfa karla sem gleðja börnin á aðventunni. 

Nemendum skólans er boðið á sýninguna og hópast bekkirnir nú þessa dagana, enda alveg sérstakur andi í þessu góða húsi og umgjörðin alveg einstök.

Mynd: www.gunnarjonsson.net

Í tilefni af Degi myndlistar sem haldinn var hátíðlegur 30. október s.l., bauð Samband íslenskra myndlistarmanna skólum upp á kynningu á starfi myndlistarmannsins, sjötta árið í röð. Kynningarnar veita ungu fólki innsýn í það viðamikla starf sem felst í því að vera myndlistarmaður og bæta þannig grunnþekkingu á faginu.

Í fyrra fékk Grunnskólinn á Ísafirði Solveigu Eddu Vilhjálmsdóttur í heimsókn, en í ár var það Gunnar Jónsson listamaður sem kynnti starf sitt fyrir nemendum í myndlistavali á unglingastigi og nemendum í 6. bekk. Gunnar sýndi myndir af verkum sínum og ræddi við nemendur um myndlist. 

Skólinn verður opinn í dag, en ferðir strætó falla niður til hádegis.

Nú höfum við fengið upplýsingar um að strætó byrjar að ganga kl. 15:00.

Upplýsingasími hjá strætó er 8781012.

Ísafjarðarbær hefur gefið út viðmið um hvenær loka eigi stofnunum vegna  óveðurs. Þar kemur m.a. fram að stofnunum bæjarins sé ekki lokað nema algjöra nauðsyn beri til og getur forstöðumaður lokað stofnun af einni eða fleirum af eftirtöldum ástæðum:

• Tilmæli frá almannavörnum eða lögreglu
• Rafmagnsleysi kemur í veg fyrir að hægt sé að halda stofnuninni opinni
• Ófærð er svo almenn að ekki næst að kalla til lágmarksfjölda starfsmanna til að halda a.m.k. skertri þjónustu

Foreldrar eru hvattir til að fylgjast með veðurspám og fréttum af veðri.  Skóla verður ekki aflýst nema tilmæli  komi frá Almannavörnum eða lögreglu. Komi ekki tilmæli frá Almannavörnum eða lögreglu verða foreldrar að meta hvort óhætt sé að börn þeirra sæki skóla. Ef foreldrar hafa börn sín heima  þá skulu þeir tilkynna skólanum um það og lítur skólinn á slík tilvik sem eðlileg forföll. Hið sama gildir ef foreld­rar lenda í vandræðum á leið sinni til skóla og verða frá að hverfa.

Strætisvagnar Ísafjarðarbæjar hafa tekið í notkun talhólfsnúmer, 8781012,  þar sem fram kemur hvort og þá hvaða ferðir falla niður. 

Foreldrar eru einnig hvattir til að fylgjast vel með  á heimasíðu almannavarna.

« 1 af 14 »

Þau eru aldeilis glæsileg piparkökuhúsin sem krakkarnir í heimilisfræðivali hafa verið að nostra við. Í dag var verkið fullkomnað eins og sjá má á meðfylgjandi myndum og mega krakkarnir aldeilis vera stoltir af þessum meistaraverkum.